க.கிஷாந்தன்-
அட்டன் போடைஸ் பிரதான வீதியில் போடைஸ் பகுதியில் 20.04.2016 அன்று மாலை 4.30 மணியளவில் பஸ் ஒன்றுடன் முச்சக்கரவண்டி மோதுண்டு பிரதான வீதியில் குடைசாய்ந்ததில் மூன்று பேர் படுங்காயங்களுக்குள்ளாகியதுடன் ஒருவர் உயிரிழந்துள்ளதாக அட்டன் பொலிஸார் தெரிவித்தனர்.
அட்டனிலிருந்து டயகம நோக்கி சென்ற பஸ்சுடன் போடைஸ் பகுதியிலிருந்து அட்டன் நோக்கி சென்ற முச்சக்கரவண்டியே இவ்வாறு மோதுண்டு விபத்துக்குள்ளாகியுள்ளது.
முச்சக்கரவண்டியில் சென்ற நான்கு பேர் படுங்காயங்களுக்குள்ளாகி டிக்கோயா கிளங்கன் வைத்தியவாலையில் சேர்க்கப்பட்ட போது அதில் ஆறுமுகம் கருப்பையா (வயது – 55) என்ற நபர் சிகிச்சை பலனின்றி உயிரிழந்துள்ளதாக தெரிவிக்கப்படுகின்றது.
குறித்த பஸ் சாரதியின் கவனயீனம் காரணமாகவே இவ்விபத்து நேர்ந்துள்ளதாக தெரிவித்த பொலிஸார் சாரதியை கைது செய்துள்ளதாகவும் தெரிவித்தனர்.
இவ்விபத்து தொடர்பான மேலதிக விசாரணைகளை அட்டன் பொலிஸார் மேற்கொண்டு வருகின்றனர்.
