கஜரூபன்-
யுத்தத்தில் சிக்குண்டு தமிழ் மக்கள் வேனையில் தவித்தபோது மஹிந்த அரசாங்கத்துடன் இருந்த டக்ளஸ் தேவானந்தா தமிழ் மக்கள் பற்றி எந்த அக்கறையும் கொள்ளாது தனது சுகபோக அரசியலில் வாழ்ந்துவிட்டு இன்று தன்னால் எதுவும் முடியாத நிலையில் போலி வார்த்தைகளையும் கொக்கரிப்புக்களையும் செய்து வருவது வேடிக்கையான விடயமாகவே பார்க்கவேண்டி இருக்கின்றது.
ஆனால் எமது தமிழ்த் தேசி யக் கூட்டமைப்பானது இவர்களது எந்தவிதமான கொக்கரிப்பிற்கும் அடிபணியாது என அம்பாறை மாவட்ட பாராளுமன்ற உறுப்பினரும் த.தே.கூட்டமைப்பின் அம்பாறை மாவட்ட அபிவிருத்திக்குழுவின் தலைவருமான கவீந்திரன் கோடீஸ்வரன் தெரிவித்தார்.
திருக்கோயில் விபுலானந்தா அகடமி கல்வி நிலையத்தின் ஏற்பாட்டில் அதன் தலைவர் எஸ்.ஜெயபாலன் தலைமையில் இம்முறை பல்கலைக்கழகத்திற்கும், கல்வி யியற்கல்லூரிகளுக்கும் தெரிவான மாணவர்களையும், கல்விப்பொது சாதாரண தரப்பரீட்சையில் அதியுயர் சித்திகளை பெற்ற மாணவர்களையும் பாராட்டி கௌரவித்து விருது வழங்கும் விழாவானது சனிக்கிழமை திருக் கோயில் கலாசார மத்திய நிலையத்தில் நடைபெற்றது.
இந்நிகழ்விற்கு பிரதம அதிதியாக அம்பாறை மாவட்ட பாராளுமன்ற உறுப்பினரும் த.தே.கூட்டமைப்பின் அம்பாறை மாவட்ட அபிவிருத்திக்குழுவின் தலைவருமான கவீந்திரன் கோடீஸ்வரன், மற்றும் கௌரவ அதிதிகளாக திருக்கோயில் வலயக்கல்வி பணிப்பாளர் ஆர்.சுகிர்தராஜன், திருக் கோயில் பிரதேச செயலாளர் எஸ்.ஜெகராஜன், தென்கிழக்கு பல்கலைக்கழகத்தின் வணிக முகாமைத்துவ பீட பீடாதிபதி எஸ்.குணபாலன், மற்றும் விசேட அதிதிகள் கிராமத்து பெரியார்கள், பொது மக்கள் என பலரும் கலந்து கொண்டனர்.
இங்கு அவர் தொடர்ந்து உரையாற்றுகையில், இந்த நாட்டிலே நல்லாட்சி நடைபெற்று வருகின்றது என்று கூறுகின்றோம் ஆனால் பாராளுமன்றத்தில் நடைபெற்ற குறை நிரப்பு பிரேரணையின் போது த.தே.கூட்டமைப்பு அரசுடன் சேர்ந்து வாக்களிக்காமல் விட்டிருக்குமானால் இன்றுள்ள நல்லாட்சி கெட்டாட்சியாக மாறியிருக்கும்.
அவ்வாறு இல்லாமல் தமிழ் மக்களின் நலன்கருதி நல்லாட்சிக்கு முட்டுக்கொடுக்கும் ஒரு கட்சியாகவே த.தே.கூட்டமைப்பு இருந்து வருகின்றது. கடந்த ஆட்சிக்காலத்தின்போது ஈ.பி.டி.பி கட்சியின் செயலாளர் நாயகமாக விளங்கும் டக்ளஸ் தேவானந்தா எவ்வாறு செயற்பட்டு தனது அரசியலை கொண்டு சென்றார் என்பது உங்கள் அனைவருக்கும் தெரிந்த விடயம்.
ஆனால் இன்று தமிழ் மக்கள் மீது ஏதோ மிகுந்த அக்கறை கொண்டவர்போல் கூக்குரல் இட்டு கொக்கரித்துக்கொண்டு போலிப்பாசாங்கு காட்டிக்கொண்டு தமிழ் மக்களால் நிராகரிக்கப்பட்டவர்களை சேர்த்துக்கொண்டு ஒரு புதிய கட்சியொன்றை உருவாக்கிக்கொண்டு தமிழ் மக்களுக்கு கிடைக்கவேண்டிய உரிமைகள், செல்வாக்குகள் அனைத்தையும் இல்லாமல் செய்ய வேண்டும் என்பதற்காக சில பேரினவாத கட்சிகளுடனும் சம்மந்தத்தினை ஏற்படுத்தி தமிழ் மக்களுக்கான விடிவு கிடைத்துவிடக்கூடாது என்ற சதித்திட்டத்தில் ஈடு பட்டு வருகின்றார்.
ஆனால் எமது தமிழ்த் தேசியக் கூட்டமைப்பானது இவர்களது எந்தவிதமான கொக்கரிப்பிற்கும் அடிபணியாததுடன் இவர்களது கதைகளை ஒரு போதும் பொருட்படுத்தப்போவதுமில்லை எமது மக்கள் நலன் சார்ந்த விடயத்தில் த.தே.கூட்டமைப்பு எப்போதும் எந்தவிடயத்தை எடுத்துக்கொண்டாலும் சரியான பாதையிலேதான் செல்லும்.
இங்கு நடைபெற்றுக்கொண்டிருக்கும் நிகழ்வானது எமது எதிர்கால சந்ததியினருக்கு மிகவும் முக்கியமான நிகழ்வாகும் நாங்கள் கல்வி என்னும் ஆயுதத்தினை கையில் எடுப்போமாக இருந்தால் நிட்சயம் சாதிக்க முடியாதவற்றையும் சாதிக்க முடியும் அன்று எமது ஆயுத போராட்டம் மௌனிக்கப்பட்டதன் பின்னர் இன்று கல்வி எனும் ஆயுதத்தினை கையில் எடுத்திருக்கிறோம்.
இதன் மூலம்தான் எதிர்காலத்தில் தமிழ் மக்களின் விடிவை எட்ட முடியும். பல சந்தர்ப்பங்களில் பேரினவாதிகள் த.தே.கூட்டமைப்பினை பிரித்தாள பல பிரயத்தனங்களை எடுத்தார்கள் ஆனால் எமது கட்சியும், தமிழ் மக்களும் அதற்கு ஒரு போதும் இடம்கொடுக்கவில்லை இடம் கொடுக்கவும் மாட்டார்கள். மக்கள் எப்போதும் த.தே.கூட்டமைப்பினர் மீதும், அதன் தலைமைமீது பற்றுறுதி கொண்டவர்களாக இருக்கின்றார்கள் அதற்காகவே எமது மக்களின் உரிமைகள், அபிவிருத்திகள் என்பவற்றை பெற்றுக்கொடுக்க வேண்டியவர்களாக நாங்கள் இருக்கின்றோம்.
எப்போது எமது தமிழ்மக்களுக்கான விடிவு, உரிமை கிடைக்கவில்லையோ அன்றே எமது கட்சி இந்த நல்லாட்சி அரசாங்கத்தை தள்ளி வீழ்த்திவிட்டு நிட்சயமாக வெளியேறும் என்பதில் மாற்றுக்கருத்திற்கு இடமில்லை. அன்று மஹிந்த ஆட்சி தமிழ் மக்களுக்கான தீர்வினை கொடுக்கும் என்ற நம்பிக்கையிலே அந்த மஹிந்த அரசாங்கத்தினை ஆட்சிக்கு கொண்டு வந்தோம்.
ஆனால் அந்த அரசாங்கமோ தமிழ் மக்களுக் கான எந்த தீர்வையும் வழங்காத நிலையிலேதான் நாங்கள் அந்த கொடூர ஆட்சியை வீழ்த்திவிட்டு மைத்திரி தலைமையிலான நல்லாட்சி அரசாங்கத்தினை ஆட்சிக்கு கொண்டுவந்தோம்.
தமிழ்த் தேசியக் கூட்டமைப்பின் தலை வர் இரா.சம்பந்தன் தலைமையில் தமிழ் மக்களுக்கான ஒரு சரியான தீர்வினை தரவேண் டும் என்று பேரினவாதிகளுக்கு மீண்டும் ஒரு சந்தர்ப்பத்தினை இந்த அரசாங்கத்திற்கு கொடுத்திருக்கின்றோம் மாறாக இந்த அரசாங்கத்தின்மூலம் தமிழ் மக்களுக்கு எந்த ஒரு நல்ல தீர்வும் கிடைக்கவில்லை என்றால் இந்த ஆட்சியையும் இல்லாமல் செய்வதற்கு த.தே.கூட்டமைப்பு என்றும் தயங்காது.
தமிழ் மக்களின் விடிவிற்காக போராடி வரும் த.தே.கூட்டமைப்பினால் தான் தமிழ் மக்களுக்கான அதாவது இலங்கை தமிழ் மக்களுக்கு மாத்திரமன்றி உலகம் பூராக வும் பரந்து வாழும் தமிழ் மக்களுக்கான விடிவு எட்டப்படுமே தவிர வேறு எந்த புதிதாக முளைக்கும் கட்சிகளால் முடியாது காரணம் த.தே.கூட்டமைப்பானது விடுதலைப்போராட்ட காலத்தின்போதும் அங்கீக ரிக்கப்பட்ட ஒரு கட்சியாகவே இருந்து வருகின்றது.
இதனை பிளவு படுத்துவதற்கு உள்நாட்டிலும், சர்வதேசத்திலும் பாரிய சதித்திட்டங்கள் நடைபெற்று வருகின்றது.
எமது இனம் இந்த நாட்டிலே சிக்குண்டு சின்னாப்பின்னமாக தவிர்த்தபோது கடந்த மஹிந்த அரசாங்கத்துடன் இணைந்து வடக் கும், கிழக்கும் பிரிவதற்கு ஆதரவு வழங்கி இன்று இந்த நல்லாட்சி அரசாங்கத்துடன் இணைந்து கொண்டு வடக்கும், கிழக்கும் இணைய வேண்டும் என்ற தோரணையில் போலியான கூக்குரல் இடு பவர்கள் தற்போதும் இருக்கத்தான் செய்கின்றார்கள். இவர்களை எமது கட்சி ஒரு போதும் கணக் கில் எடுக்கப்போவதில்லை எனவும் கூறினார்.
கடந்த காலங்களில் தமிழர்களே உயர் பதவிகளிலும், நிறைவேற்று அதிகாரங் கொண்டவர்களாகவும் இருந்திருக்கின்றார்கள். ஆனால் அது தற்போது அருகிக் கொண்டு செல்கின்றது. இதனை நாங்கள் மாற்ற வேண்டுவோமாக இருந்தால் நிதானமாக செயற்படவேண்டி இருக்கின்றது இன்று பாராட்டுக்களை பெற்ற அனைவரும் எதிர்காலத்தில் தொடர்ந்து கல்வியில் சாதனைகளை பெற்று தேசிய ரீதியிலும், சர்வதேசரீதியிலும் தமிழ் மக்களின் இருப்பை எடுத்துக்காட்டுகின்ற அளவிற்கு உயர் பதவிகளில் மிளிரவேண்டும்.
