சுலைமான் றாபி-
04 நாள் உத்தியோகபூர்வ விஜயமொன்றினை மேற்கொண்டு நேற்றைய தினம் (01) பங்காளதேஷ் நாட்டின் சுகாதார அமைச்சர் முஹம்மது நசீம் அந்நாட்டின் சுகாதார சேவைகள் பணிப்பாளர் நாயகம் பேராசிரியர் டாக்டர் டீன் முஹம்மட் நூறுல் ஹக் உள்ளிட்ட குழுவினர் இலங்கை வந்தடைந்துள்ளனர்.
இலங்கையில் இம்மாதம் 06ம் திகதி வரை இடம்பெறும் சுகாதார வைத்திய பொறிமுறை சம்பந்தமான நிகழ்வில் கலந்து கொள்வதற்காகவே அமைச்சரின் இந்த விஜயம் இடம்பெற்றுள்ளதோடு, இதில் இருநாடுகளுக்குமிடையே நிலவும் சுகாதாரப் பொறிமுறைக் குறைபாடுகளை நிபர்த்தி செய்வதற்கும் நடவடிக்கைகள் எடுக்கப்படவுள்ளதாகவும் சுகாதாரப் பிரதியமைச்சர் பைசால் காசிம் தெரிவித்தார்.
இதேவேளை இலங்கை வந்தடைந்த பங்களாதேஷ் சுகாதாரமைச்சரை சுகாதாரப் பிரதியமைச்சர் பைசால் காசிம், அமைச்சின் பணிப்பாளர் நாயகம் டாக்டர் பாலித்த மஹிப்பால உள்ளிட்ட சுகாதார அமைச்சின் உயர் அதிகாரிகள் கட்டுநாயக்க சர்வதேச விமான நிலையத்தில் வரவேற்றதும் குறிப்பிடத்தக்கதாகும்.
