முன்னாள் போராளிகள் கைதுசெய்யப்படுவதை கண்டித்து அம்பாறையில் இன்று வியாழக்கிழமை இடம்பெற்ற ஆர்ப்பாட்டத்தை குழப்பும் முயற்சியில் சிலர் ஈடுபட்டுள்ளனர்.
அம்பாறை பிரதேச செயலகத்திற்கு சென்ற ஆர்ப்பாட்டகாரர்கள், மாவட்ட அரச அதிபரிடம் மகஜர் கையளிக்க முற்பட்ட வேளையில், பிக்கு ஒருவர் உட்பட நான்கு பேர் ஆர்ப்பாட்டத்தில் ஈடுபட்டவர்களுடன் வாய்த்தர்க்கத்தில் ஈடுபட்டுள்ளனர்.
இதன்போது, ஆர்ப்பாட்டத்தில் ஈடுபட்ட பெண்ணொருவரை தாக்க முற்பட்ட நிலையில், சம்பவ இடத்திற்கு பொலிஸார் சென்று, தடுத்து நிறுத்தியுள்ளனர்.
இதேவேளை, அம்பாறை மாவட்ட செயலகம் வரை சென்ற ஆர்ப்பாட்டகாரர்கள் வீதியில் வைத்து, பிரதி அரசாங்க அதிபரிடம் கைது செய்யப்பட்ட முன்னாள் போராளிகளை விடுவிக்குமாறு கோரி மகஜரொன்றை கையளித்துள்ளனர்.
இதன்பின்னர் குறித்த ஆர்ப்பாட்டகாரர்கள் கலைந்து சென்றுள்ளனர்.
