தேர்தலுக்காக முஸ்லிம்களின் சமய கடமைகள் பாதிக்கப்படக் கூடாதெனவும் எதிர்வரும் உள்ளூராட்சி மன்றத் தேர்தலை முஸ்லிம்களின் புனித மாதமான ரமழானில் நடாத்த வேண்டாம் எனவும் ஜனாதிபதி மைத்திரிபால சிறிசேன உத்தரவிட்டுள்ளார்.
மாகாண சபைகள் மற்றும் உள்ளூராட்சி அமைச்சர் பைசர் முஸ்தபாவுக்கே ஜனாதிபதி இந்த உத்தரவைப் பிறப்பித்துள்ளார்.
எதிர்வரும் ஜூன் மாதம் முஸ்லிம்களின் புனித கடமைகளில் ஒன்றான நோன்பு நோற்கும் ரமழான் மாதமாகையால் அம்மாதத்தில் உள்ளூராட்சி மன்றத் தேர்தலை நடாத்த வேண்டாம் எனவும் தேர்தலை எதிர்வரும் ஆகஸ்ட் மாதத்துக்கும் பின்பு நடத்துமாறும் மாகாண சபைகள், உள்ளூராட்சி அமைச்சர் பைசர் முஸ்தபாவிடம் உத்தரவைப் பிறப்பித்துள்ளார்.
முஸ்லிம்களின் இரவு நேர தராவீஹ் தொழுகை உட்பட விசேட மத கிரியைகளுக்கு இதனால் பாதிப்பு ஏற்படுமெனவும் ஜனாதிபதி தெரிவித்துள்ளார்.
இ
து தொடர்பில் மாகாண சபைகள் மற்றும் உள்ளூராட்சி அமைச்சர் பைசர் முஸ்தபாவைத் தொடர்பு கொண்டு வினவியபோது, அவர் பின்வருமாறு தெரிவித்தார்,
எதிர்வரும் உள்ளூராட்சி மன்றத் தேர்தல் ஜூனில் நடாத்தப்படுவதற்கே திட்டமிடப்பட்டிருந்தது. எல்லை நிர்ணய முறைப்பாடுகளும் துரிதகதியில் விசாரிக்கப்பட்டு வருகின்றன.
எல்லை நிர்ணய அறிக்கையை ஏப்ரல் மாதத்தில் கையளிப்பதற்கு அதற்கென நியமிக்கப்பட்ட குழு திட்டமிட்டுள்ளது.
எதிர்வரும் ஜூன் மாதம் முஸ்லிம்களின் புனித நோன்பு மாதமாகையால் ஜூனில் தேர்தலை நடாத்தவேண்டாமென ஜனாதிபதி மைத்திரிபால சிறிசேன என்னை வேண்டியுள்ளார்.
அதனால் எதிர்வரும் ஜூனில் உள்ளூராட்சி மன்ற தேர்தல் நடாத்தப்படமாட்டாது. தாமதித்தே நடாத்தப்படும் என தெரிவித்தார்.
