எனக்கு எதிராக பாரிய சதித்திட்டம் ஒன்று கூட்டு எதிர்க்கட்சி பக்கம் இருந்து முன்னெடுக்கப்படுகிறது. அரச சாட்சியாக மாறுவதற்கு நான் குற்றவாளியல்ல. பாம்பின் கால் பாம்பறிவது போன்று மஹிந்த ராஜபக் ஷ ஆட்சியில் கடமையை தவிர வேறு ஒன்றும் நான் செய்யவில்லை என்று முன்னாள் வெளிவிவகார கண்காணிப்பு எம்.பி. சஜின் டி வாஸ் குணவர்த் தன தெரிவித்தார்.
ஊடகங்கள் எனக்கு எதிராக பாரிய குற்றச்சாட்டுக்களை எவ்விதமான அடிப்படை தன்மையுமின்றி முன்வைக்கின்றன. அவ்வாறு
பாரியளவிலான குற்றத்தை நான் செய்திருந்தால் என்னை சிறையிலிட்டிருப்பார்கள். எனவே, ஊடகங்களுக்கு எதிராக குற்றவியல்
அவதூறு சட்டம் கொண்டுவரப்பட வேண் டும் எனவும் சஜின் டி வாஸ் குணவர்த்தன குறிப்பிட்டார்.
சஜின் டி வாஸ் குணவர்த்தனவின் விசேட ஊடக சந்திப்பு நேற்று வெள்ளிக்கிழமை இராஜகிரியவில் அமைந்துள்ள அவரது இல்லத்தில் இடம்பெற்றது. இதில் கலந்து கொண்டு உரையாற்றுகையிலேயே அவர் மேற்கண்டவாறு கூறினார்.்
அவர் அங்கு தொடர்ந்தும் உரையாற்றுகையில் ,
அமைதியாக தொடர்ந்தும் இருக்கும் போது
என்னை கடுமையாக தாக்குகின்றனர். பணம் கொள்ளையடித்துள்ளதாக
ஊடகங்களில் குற்றச்சாட்டுக்கள் முன்வைக்கப்படுகின்றன. ஸ்ரீலங்கன் விமான சேவையில் மோசடி செய்ததாகவும் கூறுகின்றனர். ஆனால் இவை எதையும் உறுதிப்பட கூறுவதில்லை . வெறுமனே குற்றச்சாட்டுக்களாக முன் வைக்கின்றனர். இது நியாயமில்லை. விமல் வீரவங்ச மற்றும் உதய கம்மன்பில போன்றவர்கள் மிகவும் மோசமாக செயற்பட்டு மஹிந்த ராஜபக்ஷவின் பெயரில் அரசியல் செய்கின்றனர். இவர்களுக்கு தனித்து போட்டியிட்டு வெற்றிப் பெற முடியாது . வெற்றிலையை விட்டு சென்றால் யாருக்கும் எதிர்காலம் இல்லை.
ஊடகங்களின் அனைத்து கேள்விகளுக்கும் பதிலளிக்கவே நான் இன்று உங்களை சந்திக்கின்றேன். எனக்கு எதிராக சதி செய்யப்படுகின்றது. இதனை ராஜபக்ஷ ஒருவர் தான் பின்னின்று இயக்குகின்றார். 87 வங்கி கணக்குள் எனக்கு காணப்படுவதாக கூறுகின்றனர். அதில் எவ்விதமான உண்மையும் இல்லை.குற்றம் செய்திருந்தால் சிறையில் அடைக்கப்பட்டிருப்பேனே தவிர உங்கள் முன் வந்திருக்க மாட்டேன். குற்றவியல் திணைக்களம் மற்றும் நிதி மோசடிகள் தொடர்பான ஜனாதிபதி விசாரணை ஆணைக்குழு இவற்றில் எனக்கு எதிராக விசாரணைகள் முன்னெடுக்கப்படுகின்றன. ஆகவே நான் நானாக இருக்கின்றேன். குற்றச்சாட்டுகள் அடிப்படையற்றவையாகும்.
கடந்த ஆட்சியில் எனது கடமையை சரிவர செய்துள்ளேன். எனவே நான் அச்சம் கொள்ள தேவையில்லை. ஆனால் மஹிந்த ராஜபக்ஷவின் தோல்விற்கு நான் காரணம் என கூறினார்கள். அதில் எவ்விதமான உண்மையும் இல்லை. ஜனாதிபதி தேர்தலில் தோல்வியடைந்த பின்னர் மஹிந்த ராஜபக்ஷ குருநாகல் மாவட்டத்தில் பாராளுமன்ற உறுப்பினராக போட்டியிட்டமையை நான் விரும்ப வில்லை. ஆனால் கூட்டு எதிர் க் கட்சி என கூறிக் கொண்டு போலியாக செயற்படுகின்றனர். அப்படியொரு கட்சியே கிடையாது . நான் தொடர்ந்தும் ஸ்ரீலங்கா சுதந்திர கட்சியில் அரசியலில் ஈடுபடுவேன். அதற்கான அனுமதியை மக்கள் எனக்கு வழங்கியுள்ளார்கள். கடந்த பொது தேர்தலில் எனக்கு வேட்பு மனு வழங்கப்பட வில்லை. இதன் பின்னணியில் சதி காணப்பட்டது. தற்போதுஅந்த சதி திட்டம் வெ ளிப்படத் தொடங்கி விட்டது. காலி மேதின கூட்டத்திற்கு சென்றேன். விமல் வீரவங்க கூறுவது போன்று கிருலப்பனைக்கு நான் சென்றிருக்க வேண்டிய அவசியம் இல்லை.
கிறிஸ் நோனிசை தாக்கியதாக கூறுகின்றனர். ஆனால் அது வெறும் வாக்குவாதம் மாத்திரமேயாகும். உண்மைக்கு முரணான தகவல்களை வெ ளியிட்டு அநாவசியமாக பிரச்சினையை வளர்த்தது ஊடங்கள் தான். யானை குட்டி எனது வீட்டில் இருந்தது. ஆனால் அதற்கும் எனக்கும் தொடர்பில்லை. சட்ட ரீதியாக பெற்றுக் கொண்டவர்கள் ஆவணங்களை சமர்ப்பித்து பிரச்சினையை தீர்த்துக் கொண்டார்கள். ஆனால் பாதிக்கப்பட்டது நான் தான். எனவே என் மீதான குற்றச்சாட்டுகளுக்கு நான் நீதி மன்றில் நீதியை பெற்றுக் கொள்கின்றேன். எனக்கு எதிராக தீட்டப்படும் சதிக்கு காரணத்தை கண்டறிய வேண்டியது அவசியமாகும் என்றார்.
