சென்னை நுங்கம்பாக்கத்தில் இளம்பெண் சுவாதி கொலை செய்யப்பட்ட வழக்கில் குற்றவாளி ராம்குமார் கைது செய்யப்பட்டுள்ளார். அவர் கைது செய்யப்பட்டது குறித்த தகவல்களை காண்போம்.
ராம்குமார் சென்னையில் கடந்த 3 ஆண்டுகளாகவும், சூளைமேட்டை பொறுத்தவரை கடந்த 3 மாதங்களாக தங்கியிருந்ததாகவும் கூறப்படுகிறது. இன்போசிஸ் நிறுவனத்தில் பணியாற்றிவந்த இளம்பெண் சுவாதியை ஒருதலையாக அவர் காதலித்ததாகவும், சுவாதி காதலை ஏற்காததால் அவரை கொலை செய்ததாகவும் முதற்கட்ட விசாரணையில் தெரியவந்துள்ளது.
சூளைமேட்டில் உள்ள மேன்சனில் ராம்குமார் தங்கியிருந்ததாகவும், சுவாதி கொலைக்கு பிறகு அவர் சொந்த ஊர் சென்றுவிட்டதாகவும் கூறப்படுகிறது. காவல்துறையினர் வெளியிட்ட புகைப்படத்தினை கண்ட மேன்சன் மேனேஜர் சந்தேகத்தின் அடிப்படையில் காவல்துறையினருக்கு தகவல் அளித்ததாகவும், அதன் அடிப்படையிலேயே சென்னையில் இருந்து செங்கோட்டை விரைந்த தனிப்படை போலீசார் அவரை கைது செய்ததாகவும் கூறப்படுகிறது.
சென்னை நுங்கம்பாக்கம் ரயில் நிலையத்தில் ஜூன் 24-ஆம் தேதி காலை 6:30 மணியளவில் சுவாதி கொலை செய்யப்பட்டது முதல் நேற்று இரவு பத்து மணிக்கு குற்றவாளி ராம்குமார் கைது செய்யப்பட்டது வரையில் இவ்வழக்கில் நடந்தது என்ன என்பது குறித்த தொகுப்பை தற்போது பார்ப்போம்.
ஜூன் 24 தேதி
● காலை ரயில் நிலையத்தில் அவரது தந்தை சந்தான கோபாலகிருஷ்ணன் சுவாதியை பைக்கில் கொண்டு வந்து இறக்கி விட்டு சென்றார்.
● சுமார் 6:30 மணியளவில் சுவாதியின் பின்னால் நின்றிருந்த மர்மநபர் அவரை அரிவாளால் வெட்டி விட்டு தப்பிச்சென்றார்.
● ரயில் பயணிகள் சம்பவத்தை கண்டு அதிர்ச்சியில் உறைந்தனர். சில பயணிகள் கொலையாளியை துரத்திக்கொண்டு சென்றனர்.
● ரயில்வே நடைபாதை வழியாக ஓடிய கொலையாளி அங்கிருந்த சுவர் வழியாக குதித்து தப்பிச்சென்றார்.
● மர்மநபரால் கொலை செய்யப்பட்ட சுவாதியின் உடல் 3 மணி நேரமாக நுங்கம்பாக்கம் ரயில்நிலையத்திலே கிடந்தது.
● 9:00 மணிக்கு பின்னரே ரயில் நிலையத்தில் இருந்து ரயில்வே காவல் துறையினர் உடலை அப்புறப்படுத்தினர்.
● சுவாதி கொலை செய்யப்பட்ட சம்பவம் சில மணி நேரங்களில் தமிழகம் முழுவதும் பரவி பெரும் பரபரப்பு ஏற்பட்டது.
ஜூன் 25ம் தேதி
● நுங்கம்பாக்கம் ரயில் நிலையத்தில் கண்காணிப்பு கேமரா இல்லாததால் குற்றவாளியை பிடிப்பதில் சிக்கல் ஏற்பட்டது.
● ரயில் நிலையத்தின் அருகில் உள்ள வீடுகளின் கண்காணிப்பு கேமரா பதிவில் சந்தேகத்திற்குரிய நபரின் உருவம் பதிவானது தெரியவந்தது.
● போலீசார் அந்த நபர் தான் கொலையாளியாக இருக்கும் என்ற சந்தேகத்தில் சிசிடிவி பதிவை ஊடகங்களுக்கு வெளியிட்டனர்.
ஜூன் 26ம் தேதி
● நுங்கம்பாக்கம் ரயில் நிலையத்தை ஒட்டிய சௌராஷ்ரா நகரில் உள்ள மற்றொரு வீட்டின் கண்காணிப்பு கேமரா பதிவில், சந்தேகத்துக்கு உரிய நபர் ரயில் நிலையச் சுவரைத் தாண்டிக் குதிக்கும் காட்சி இடம்பெற்றிருந்தது.
● இரண்டாவது வீடியோவை வெளியிட்ட போலீசார், இது கொலையாளியின் மற்றொரு வீடியோ என்று தெரிவித்தனர்.
● ஆனால் இரண்டு வீடியோவிலிருந்த நபர்களிடையே பெரும் வித்தியாசமிருந்ததால் குழப்பம் நிலவியது.
● நகரத்தில் நிலவும் பாதுகாப்பற்ற சூழ்நிலை குறித்து சென்னை உயர்நீதிமன்றம் கண்டனம்.
ஜூன் 27ம் தேதி
● மூன்று நாட்களாகியும் துப்பு துலங்காததால் கொலையாளியை கண்டுபிடிக்க முடியாமல் ரயில்வே போலீசார் திணறல்.
● சுவாதி கொலை வழக்கு ரயில்வே காவல்துறையிடமிருந்து சென்னை பெருநகர காவல்துறைக்கு மாற்றப்பட்டது.
● கொலையாளியை பிடிக்க 8 தனிப்படைகள் அமைக்கப்பட்டன. சுவாதியின் பெற்றோர், நண்பர்கள், உறவினர்களிடம் போலீசார் தீவிர விசாரணை.
● சுவாதியின் தொலைபேசி உரையாடல்கள், தொலைபேசி எண்களை போலீசார் சேகரித்தனர். விசாரணையில் துன்புறுத்தியதாக சுவாதியின் பெற்றோர் முதல்வரின் தனிப்பிரிவில் புகார்.
● ஸ்டாலின், குஷ்பு, திருமாவளவன், ஜி.ராமகிருஷ்ணன், தா.பாண்டியன், தமிழிசை ஆகியோர் சுவாதி பெற்றோரை சந்தித்தால் அரசியல் பிரச்சனையாக உருவெடுத்தது சுவாதியின் மரணம்.
ஜூன் 28ம் தேதி
● சுவாதி கொலையாளியை கண்டுபிடிக்க முடியாததால் போலீசாருக்கு எதிர்ப்பு வலுத்தது.
● தாமே முன்வந்து வழக்கை விசாரணைக்கு எடுத்துக் கொண்டது சென்னை உயர்நீதிமன்றம்.
● 2 நாட்களுக்குள் வழக்கில் முன்னேற்றமில்லை என்றால், நீதிமன்றமே விசாரணையை நடத்த நேரிடும் என எச்சரிக்கை.
● சுவாதி குறித்து அவதூறு பரப்ப வேண்டாம் என அவரின் தந்தை வேண்டுகோள்.
ஜூன் 29ம் தேதி
● சுவாதியின் பேஸ்புக் முடக்கம்.
● செங்கல்பட்டு பரனூர் அருகே கொலையாளி மறைந்திருப்பதாக தகவல் பரவியது சிசிடிவியில் பதிவான மாதிரி புகைப்படத்தை வைத்து பரனூரில் வீடு வீடாக சென்று போலீசார் விசாரணை .
ஜூன் 30ம் தேதி
● தெளிவான புகைப்படம் என்று நுங்கம்பாக்கத்தில் நடைபாதையில் ஓடிய நபரின் தெளிவான புகைப்படத்தை வெளியிட்டனர் போலீசார்.
● சுவாதி செல்போன் கடைசியாக சூளைமேட்டில் சிக்னலில் உயிர்ப்புடன் இருந்ததாக போலீசார் தகவல்.
● கொலையாளி தங்கியிருந்த மேன்சனில் போலீசார் தீவிர விசாரணை.
● அருகிலுள்ள மேன்சன் காவலாளி மற்றும் மேலாளர் அளித்த தகவலின் பேரில் போலீசார் நெல்லை பயணம் குற்றவாளியை நெருங்கி விட்டதாக சென்னை மாநகர காவல்ஆணையர் பேட்டி.
ஜூலை 1ம் தேதி
● செங்கோட்டை அருகே சுப்பிரமணியபுரத்தில் குற்றவாளி பதுங்கியிருப்பதாக தகவல் காலை முதல் ஆடு மேய்த்துக் கொண்டிருந்த குற்றவாளியை போலீசார் நோட்டமிட்டுள்ளனர்.
● ஆடு மேய்த்து விட்டு மாலை வீடு திரும்பினார் கொலையாளி ராம்குமார்.
● இரவு வரை காத்திருந்த போலீசார் 10 மணியளவில் ராம்குமாரை கைது செய்ய முயன்றனர்.
● போலீசாரை கண்டவுடன் பிளேடால் கழுத்தை அறுத்துக்கொண்டு தற்கொலைக்கு முயன்றார் ராம்குமார்.
● ராம்குமாரை கைது செய்த போலீசார், அவரை சிகிச்சைக்காக செங்கோட்டை தனியார் மருத்துவமனைக்கு அழைத்து சென்றனர்.
● பின்னர் பாளையங்கோட்டை அரசு மருத்துவமனையில் உயர் சிகிச்சைக்காக சேர்த்தனர். தாம்தான் கொலை செய்ததாக ராம்குமார் காவல்துறையிடம் ஒப்புதல் வாக்குமூலம்.
● தற்கொலைக்கு முயன்றதால் ராம்குமார் கழுத்தில் 18 தையல் போடப்பட்டுள்ளது.
