பிரபல ரகர் வீரர் வசிம் தாஜூடின் கொலை தொடர்பில் உரிய விசாரணை நடத்தவில்லை என முன்னாள் சட்ட வைத்திய அதிகாரி ஆனந்த சமரசேகர மீது குற்றம் சுமத்தப்பட்டுள்ளது. தாஜூடின் சடலத்தின் உடற்பாகங்கள் காணாமல் போனமைக்கு சட்ட வைத்திய அதிகாரி ஆனந்த சமரசேகர பொறுப்பு சொல்ல வேண்டுமென சுகாதார மற்றும் போசாக்கு அமைச்சு தெரிவித்துள்ளது.
இது தொடர்பில் கடிதமொன்றை அமைச்சு, கொழும்பு மேலதிக நீதவான் நிசாந்த பீரிஸிற்கு விளக்கம் அளித்துள்ளது.
அரச சேவையிலிருந்து ஓய்வு பெற்றுள்ள முன்னாள் சட்ட வைத்திய அதிகாரி தொடர்பில் உரிய நடவடிக்கை எடுக்குமாறு அமைச்சு புலனாய்வுப் பிரிவிற்கு அறிவித்துள்ளது.
அமைச்சின் செயலாளர் அனுர ஜயவிக்ரமவின் கையொப்பத்துடன் கூடிய கடிதமொன்று அனுப்பி வைக்கப்பட்டுள்ளது.
2015ம் ஆண்டில் இந்த சம்பவம் குறித்து சுகாதார அமைச்சு விசாரணைகளை ஆரம்பித்துள்ளது.
முன்னாள் சட்ட வைத்திய அதிகாரி தாஜூடின் மரணம் குறித்து உரிய முறையில் பிரேதப் பரிசோதனை நடத்தவில்லை எனவும் ஏற்றுக்கொள்ளப்பட்ட நியதிகளுக்கு அமைய உடற் பாகங்களை பாதுகாக்க தவறியுள்ளதாகவும் குற்றம் சுமத்தப்பட்டுள்ளது.
எனவே, முன்னாள் சட்ட வைத்திய அதிகாரிக்கு எதிராக உரிய நடவடிக்கை எடுக்குமாறு புலனாய்வுப் பிரிவிடம், சுகாதார மற்றும் போசாக்கு அமைச்சு எழுத்து மூலம் கோரியுள்ளது.
