வஸீம் தாஜுதீன் படு கொலை தொடர்பில் கொலையாளிகளை அவசரமாக கைது செய்யுமாறும், கொலையுடன் தொடர்பு அற்ற தன்னை பிணையில் விடுவிக்குமாறும் முன்னாள் மேல் மாகாண பிரதிப் பொலிஸ் மா அதிபர் அனுர சேனநாயக்க நேற்று பிரதிவாதிக் கூண்டில் இருந்தவாறு நீதிவானிடம் மன்றாடினார்.
குற்றப் புலனாய்வுப் பிரிவினர் இக்கொலை விசாரணைகளைப் பொறுப்பேற்று இரு வருடங்களும் ஒரு மாதமும் கடந்துள்ள நிலையில் தன்னை இக்கொலையுடன் தொடர்புடைய சாட்சிகளை மறைத்ததாகக் கூறி கைது செய்து ஒரு வருடமும் 3 மாதங்களுமாகின்றன. என் மீதான குற்றச்சாட்டுகளுக்கேனும் இதுவரை சாட்சிகளை அவர்கள் மன்றில் சமர்பிக்க வில்லை.
இதுவரை சமர்ப்பிக்கப்பட்ட அத்தனை பீ அறிக்கைகளின் பிரகாரமும் என்னை தொடர்ந்து விளக்கமரியலில் வைப்பதற்கான எந்த ஆதாரமும் இல்லை என்பதை நான் அறிவேன்.கொலைச் சதி தொடர்பில் சந்தேகம் சந்தேகம் எனக் கூறியே என்னை விளக்கமறியலில் வைத்துள்ளனர்எ னக்கு பிணை அளிக்க இந்த நீதிமன்றுக்கு அதிகாரம் உள்ளது.
நான் கொலை செய்யவில்லை. எனவேதான் வஸீமின் கொலையாளிகளை உடன் கைது செய்யுங்கள் என இந்த மன்றைக் கோருகின்றேன். வஸீமைக் கொலை செய்தவர்களைக் கைது செய்யுங்கள் என வலியுறுத்தி அனுர சேனநாயக்க நீதிவானிடம் மன்றாடினார்.
நேற்றைய வஸீம் தாஜுதீன் கொலை வழக்கின் போதே அவர் இவ்வாறு மன்றாடினார். எனினும் நேற்றும் பிணை வழங்காத நீதிவான் விளக்கமறியலை எதிர்வரும் 30 ஆம் திகதி வரை நீடித்தார்.
