க.கிஷாந்தன்-
தனது சகோதரனின் முச்சக்கரவண்டிக்கு நிறப்பூச்சி பூசிக் கொண்டிருந்த வேளையில் நபர் ஒருவர் மின்சாரம் தாக்கி உயிரிழந்துள்ளார். தலவாக்கலை பொலிஸ் பிரிவிற்குட்பட்ட வட்டகொடை மெதகும்புர மத்திய பிரிவில் இந்த சம்பவம் 02.04.2017 அன்று இரவு 7 மணியளவில் இடம்பெற்றுள்ளதாக விசாரணைகளை மேற்கொண்டு வரும் தலவாக்கலை பொலிஸார் தெரிவித்தனர். இச்சம்பவத்தில் உயிரிழந்தவர் 3 பிள்ளைகளின் தந்தையான வேலுசாமி விஜயராஜ் (வயது 41) என அடையாளம் காணப்பட்டுள்ளார்.
சம்பவம் தொடர்பில் மேலும் தெரியவருவதாவது,
உயிரிழந்தவரின் சகோதரனின் முச்சக்கரவண்டிக்கு நிறப்பூச்சி பூசிக் கொண்டிருந்த வேளையில் ஈடுப்பட்டிருந்த போது, வெளிச்சத்திற்காக உபயோகிக்கப்பட்ட மின்குமிழின் மின்சாரம் தாக்கியதால் இவர் உயிரிழந்திருப்பதாக தெரியவந்துள்ளது.
உயிரிழந்தவரின் சடலம் பிரேத பரிசோதனைக்காக லிந்துலை பிரதேச வைத்தியசாலையில் வைக்கப்பட்டுள்ள நிலையில், மரணம் தொடர்பில் மேலதிக விசாரணைகளை தலவாக்கலை பொலிஸார் மேற்கொண்டு வருகின்றனர் என்பது குறிப்பிடதக்கது.
