கிண்ணியா நகரசபை மற்றும் பிரதேச சபை எல்லையை மறுசீரமைக்க நடவடிக்கை எடுக்குமாறு திருகோணமலை மாவட்டப் பாராளுமன்ற உறுப்பினர் இம்ரான் மஹ்ரூப் மாகாணசபைகள் மற்றும் உள்@ராட்சி அமைச்சர் பைசர் முஸ்தபாவிடம் கோரிக்கை விடுத்துள்ளார்.
கடந்த புதன் கிழமை அமைச்சரை அவரது அமைச்சில் சந்தித்து இக்கோரிக்கையை அவர் விடுத்துள்ளார். அக்கோரிக்கையில் தெரிவிக்கப்பட்டுள்ளதாவது:
திருகோணமலை மாவட்டத்தின் கிண்ணியா பிரதேச செயலகப் பிரிவு 146.9 சதுர கிலோ மீற்றர் பரப்பளவைக் கொண்டது. இதில் வரும் நகரசபை 17 கிராம உத்தியோகத்தர் பிரிவுகளையும் பிரதேச சபை 14 கிராம உத்தியோகத்தர் பிரிவுகளையும் கொண்டுள்ளது.
எனினும் நகரசபை சுமார் 9 சதுர கிலோமீற்றர் பரப்பளவினுள் மட்டுமே உள்ளடக்கப்பட்டுள்ளது. இதனால் நகர சபைப் பகுதியில் அபிவிருத்தி நடவடிக்கைகளை மேற்கொள்ள அரச காணிகள் இல்லாத நிலை காணப்படுகின்றது. இது எதிர்காலத்தில் இப்பகுதியில் பாரிய சிக்கல்களைத் தோற்றுவிக்கும்.
எனவே இதனை நிவர்த்திக்கும் பொருட்டு இந்த இரு சபைகளின் எல்லையில் இருக்கும் உப்பாறு கிராம உத்தியோகத்தர் பிரிவை இரண்டாகப் பிரித்து அதன் ஒரு பகுதியை கிண்ணியா நகர சபையின் எல்லையுடன் இணைக்க வேண்டும். உப்பாறு கிராம உத்தியோகத்தர் பிரிவு பெருமளவு நிலப்பரப்பைக் கொண்டுள்ளதால் இது சாத்தியமான விடயம் என்றும் அக்கோரிக்கையில் இம்ரான் எம்.பி சுட்டிக்காட்டியுள்ளார்.
