தலவாக்கலை பி.கேதீஸ்-
தலவாக்கலை மேல்கொத்மலை நீர்த்தேக்கத்திலிருந்து ஆண்ணொருவரின் சடலமொன்று 20.1.2018 சனிக்கிழமை மாலை 6 மணியளவில் மீட்கப்பட்டுள்ளதாக தலவாக்கலை பொலிஸார் தெரிவித்தனர்.
இது தொடர்பாக தெரியவருவதாவது 20.1.2018 சனிக்கிழமை பிற்பகல் 4 மணியளவில் தலவாக்கலை மேல்கொத்மலை நீர்த்தேக்கத்தில் ஆண்ணொருவரின் சடலமொன்று மிதப்பதை கண்ட பிரதேசவாசிகள் தலவாக்கலை பொலிஸாருக்கு வழங்கிய தகவலையடுத்து சம்பவ இடத்துக்கு சென்ற தலவாக்கலை பொலிஸார் நுவரெலியா மாவட்ட நீதவான் நீதிமன்ற நீதவான் பிரமோத ஜயசேகர முன்னிலையில் சடலத்தை மீட்டு பிரேத பரிசோதனைக்காக நுவரெலியா மாவட்ட வைத்தியசாலைக்கு அனுப்பி வைத்துள்ளனர்.
இவ்வாறு சடலமாக மீட்கப்பட்டவர் பத்தனை மவுண்ட்வேனன் தோட்டத்தை வசிப்பிடமாக கொண்ட பழனியாண்டி அருள்குமார் வயது ( 40 ) என்பவராவார். குறித்த நபர் புவக்பிட்டிய பகுதியைச் சேர்ந்தவரெனவும் பத்தனை மவுண்ட்வேணன் தோட்டத்தில் பெண்ணொருவரை திருமணம் செய்து அங்கேயே வாழ்ந்து வருவதாகவும்.கடந்த 16ம் திகதி கொழும்புக்கு வேலைக்கு செல்வதாக கூறி வீட்டிலிருந்த சென்றதாகவும் இவர் வழமையாக கொழும்புக்கு வேலைக்கு செல்லும்போது வீட்டிற்கு போன் செய்வதில்லை மீண்டும் விடுமுறையில் மாத்திரம் வீட்டிற்கு வருவதாகவும் எனவே இவர் காணாமல் போன சம்பவம் குறித்து வீட்டாருக்கு தெரியாது எனவும் பொலிஸாரின் ஆரம்பக்கட்ட விசாரணையின்போது தெரியவந்துள்ளது.
மேலும் இதுதொடர்பிலான மேலதிக விசாரணைகளை முன்னெடுத்து வருவதாக தலவாக்கலை பொலிஸார் தெரிவித்துள்ளனர்.