வென்னப்புவ பிரதேச சபையின் கீழ் இயங்கும் தங்கொட்டுவ வாராந்த சந்தையில் முஸ்லிம் வர்த்தகர்களும் வியாபாரத்தில் ஈடுபட அனுமதி வழங்குமாறு, மாறவில நீதவான் நீதிமன்றம் உத்தரவிட்டுள்ளது.
தங்கொட்டுவ வாராந்த சந்தையில் முஸ்லிம் வர்த்தகர்கள் வியாபாரம் செய்வதற்குத் தடை விதித்து, வென்னப்புவ பிரதேச சபைத் தலைவரினால், கடந்த (24) திங்கட்கிழமை அறிவித்தல் ஒன்று வெளியிடப்பட்டிருந்தது.
எனினும், இது தொடர்பில் (28) வெள்ளிக்கிழமை வென்னப்புவ பிரதேச சபைத் தலைவரிடம் மாறவில நீதவான் நீதிமன்றம் விசாரணைகளை மேற்கொண்டிருந்ததுடன், அனைத்துத் தரப்பினருக்கும் வியாபாரம் செய்ய அனுமதி வழங்குமாறும் உத்தரவிட்டுள்ளது.
கடந்த காலங்களில் இடம்பெற்ற தீவிரவாதத் தாக்குதல்களை அடுத்து, இப்பிரதேசங்களில் இருக்கும் முஸ்லிம் மக்கள் பொதுச் சந்தைப் பகுதிக்கு வருவதற்கு, வியாபார சமூகமும் ஏனைய மக்களும் தமது எதிர்ப்பை வெளியிட்டுள்ள நிலையில், இப்பிரதேசத்தில் அமைதியான சூழ்நிலையை ஏற்படுத்துவதற்காகவே இந்நடவடிக்கையை எடுக்க நேரிட்டதாக, பிரதேச சபைத் தலைவர் 2019.06.24 ஆம் திகதி இடப்பட்ட குறித்த கடிதத்தில் சுட்டிக்காட்டியிருந்தமை குறிப்பிடத்தக்கது.
