கடன்களை மீள் செலுத்துதல் தொடர்பான இருதரப்பு தொழிநுட்ப கலந்துரையாடல் ஒன்று இலங்கை மற்றும் இந்திய நாடுகளுக்கிடையில் நேற்று முன் தினம் இடம்பெற்றுள்ளது
இலங்கைக்கான இந்திய தூதரகம் இன்று வெளியிட்டுள்ள ஊடக அறிக்கையில் இந்த விடயம் தெரிவிக்கப்பட்டுள்ளது.
கடன்களை மீள செலுத்துவதற்கான கால எல்லையை மீள ஒழுங்கமைப்பது தொடர்பாக இதன் போது கலந்துரையாடப்பட்டுள்ளது
இந்திய வெளியுறவு அமைச்சு, இந்திய நிதி அமைச்சு மற்றும் EXIM வங்கி ஆகியவற்றின் அதிகாரிகளை உள்ளடக்கிய தூதுக்குழுவினர் இலங்கை நிதி அமைச்சின் வெளியுறவு வளங்கள் தொடர்பான திணைக்கள அதிகாரிகள் குழுவுடன் காணொளி காட்சி மூலம் இந்த கலந்துரையாடலில் ஈடுபட்டனர்.
தற்போது சர்வதேச ரீதியில் ஏற்பட்டுள்ள கொரோனா வைரஸ் தாக்கம் மற்றும் அதனால் ஏற்பட்டுள்ள பொருளாதார பாதிப்புகள் ஆகியன குறித்து, முன்னதாக ஜனாதிபதி கோட்டாபய ராஜபக்ஷ மற்றும் பிரதமர் மஹிந்த ராஜபக்ஷ ஆகியோர் இந்திய பிரதமர் நரேந்திர மோடியுடன் பல்வேறு சந்தர்ப்பங்களில் தொலைபேசி ஊடாக கலந்துரையாடியிருந்தனர்.
இதன்போது கொரோனா தாக்கத்தை கட்டுப்படுத்துவதற்கு சாத்தியமான அனைத்து உதவிகளையும் இலங்கைக்கு வழங்குவதாக இந்திய பிரதமர் நரேந்திர மோடி உறுதியளித்திருந்தார்.
இந்த நிலையிலேயே கடன்களை மீள செலுத்துவதற்கான கால எல்லையை மீள ஒழுங்கமைப்பது தொடர்பான குறித்த கலந்துரையாடல் நேற்று முன் தினம் இடம்பெற்றது.
இதேவேளை, இந்த விடயம் தொடர்பிலான அடுத்த கட்ட கலந்துரையாடலை விரைவில் மேற்கொள்ள திட்டமிடப்பட்டுள்ளதாக இலங்கைக்கான இந்திய தூதரகம் தெரிவித்துள்ளமை குறிப்பிடத்தக்கது
