பதுளையில் பிறந்து, அங்கேயே ஆரம்பகல்வியையும், யாழ்ப்பாணத்தில் இடைநிலைக் கல்வியையும் ஜப்பானிலும் உயர்கல்வியையும் கற்று, கொழும்புப் பல்கலைக்கழகத்தின் கல்விப்பீடத்தின் தலைவராக பணிபுரிந்து ஓய்வு பெற்ற மலையகத்தின் பெருமை மிகு பேராசிரியர் சோ.சந்திரசேகரன், தன் வாழ்நாள் முழுவதும் எளிமையைக் கிரீடமாக அணிந்திருந்தவர். கல்வியியலுக்கு அப்பால் அவர் சமூகத்துக்குக் கற்றுக்கொடுத்தது ஆயிரம். அதில் முதலாவது எளிமை, இரண்டாவது இனிமை. இந்த இரண்டோடு இன்னுமொருவரை மலையகத்தில் பேராசிரியராக காணும் காலம் வருமா ? எனும் ஏக்கத்தை எம்மிடையே விட்டு எம்மைவிட்டுப் பிரிந்துள்ளார். அன்னாருக்கு மலையக அரசியல் அரங்கத்தின் சார்பில் எமது அஞ்சலிகளைப் பதிவு செய்கிறோம் என முன்னாள் நாடாளுமன்ற உறுப்பினரும் மலையக அரசியல் அரங்கத்தின் தலைமை ஒருங்கிணைப்பாளருமான மயில்வாகனம் திலகராஜ் விடுத்திருக்கும் இரங்கல் செய்தியில் தெரிவித்துள்ளார்.
பேராசான் சோ.சந்திரசேகரன் தனது துறையான கல்வியியலுக்கு அப்பால் மலையக சமூகம் குறித்த பலதரப்பட்ட விடயங்களில் அக்கறையுடன் செயற்பட்டவர். இலங்கை இந்தியர் வரலாறு எனும் அவரது வரலாற்று நூல் இலங்கை வாழ் இந்திய வமசாவளியினரின் வருகையையும் வாழ்வையும் பதிவு செய்யும் முக்கியமான நூல். இது தவிர இன்னும் கல்வித்துறை சார்ந்து பல நூல்களை எழுதியுள்ளார். இலக்கிய ஈடுபாடு கொண்ட இவர் கொழும்புத் தமிழ்ச்சங்கத்தின் தலைவராகவும் செயற்பட்டவர். ஆயுட்கால உறுப்பினரும் கூட. பல இலக்கிய நூல்களைக்கு முன்னுரை, அணிந்துரை எழுதி உள்ளார். அரசியல் கட்சி பேதங்கள் பாராது இலங்கைத் தொழிலாளர் காங்கிரஸ், மலையக மக்கள் முன்னணி, தமிழ் முற்போக்கு கூட்டணி என எல்லாத்தரப்பினருக்கும் தனது அறிவை ஆலோசனையாக அவ்வப்போது பகிர்ந்து கொண்டவர். சிந்தனைக் குழாம் உறுப்பினராக இயங்கியவர். மலையகப் பல்கலைக்கழகம் ஒன்றை உருவாக்க வேண்டும் என்பதில் உறுதியான நிலைப்பாட்டைக் கொண்டு பல கட்டுரைகளை தர்க்க ரீதியாக எழுதியவர், கருத்துக்களை முன்வைத்தவர். சுவையான பேச்சாளர். அங்கதச் சுவையுடன் கல்வித்துறை மீதான சுய விமர்சனத்துடனும் அமையும் அவரது உரை எப்போதும் சபையைக் கவரும். எளிமையாகவும் இனிமையாகவும் எல்லோருடனும் பழகும் எல்லா சமூகத்தினருடனும் சகஜமான உறவைப் பேணி வந்தவர். இவர் போன்று ஒரு பேராசனை இனி மலையகம் காண்பதரிது. அன்னாருக்கு எமது அஞ்சலிகளைப் பதிவு செய்வதுடன் அவரது குடும்த்தினர் நண்பர்கள் உறவினர்களுக்கு எமது ஆழ்ந்த அனுதாபங்களையும் தெரிவிக்கிறோம்.
இந்த செய்தியை நண்பர்களுடன் பகிர்ந்து கொள்ள...
எமது உத்தியோகபூர்வ பேஸ்புக் பக்கம்
எமது செய்திகளை உடனுக்குடன் பேஸ்புக் மூலம் அறிந்து கொள்ள எமது பேஸ்புக் பக்கத்தை லைக் (like) செய்க!
எமது இணையத்தளத்துக்கு அனுப்பிவைக்கப்படும் ஆக்கங்கள் , செய்திகள் என்பவற்றுக்கு அதனை அனுப்பிவைப்பவர்களே பொறுப்பாளிகள் ஆவர். தவறான அல்லது பிழையான, அவதூறு, பிறர் மனங்களை புண்படுத்தும் செய்திகள் அல்லது தகவல்களுக்கு எமது நிருவாகமோ இணையத்தளமோ பொறுப்பாளியல்ல. இதனைக்கருத்தில் கொண்டு தகவல் தொடர்புகளை மேற்கொள்ளுமாறு வேண்டுகின்றோம்.- நிருவாகம் -
0 comments :
Post a Comment